Бојана е млада, амбициозна и инспиративна девојка чие секојдневие се движи помеѓу предизвиците на модерниот живот и мирот што го носи трчањето. Во ова интервју, таа ни открива како трчањето ѝ помогнало да се ослободи од стресот и како изгледаат трките од нејзините соништа.
Superior Runs: Како започна твојата кариера во атлетиката?
Бојана K.: Започнав со рекреативно трчање заедно со мајка ми, како начин да се посветам на себе и да го намалам стресот од секојдневните обврски. Со текот на времето, трчањето од хоби прерасна во страст и ми се јави желбата да почнам да учествувам на трки.
Superior Runs: Кои се твоите најголеми достигнувања досега?
Бојана K.: Едно од моите поголеми достигнувања е второто место кое го освоив на овогодинешната трка во Кавадарци, како и петтото место на OCR трката со препреки во Кучково, која воедно беше и моја прва трка од таков тип.
Superior Runs: Што те мотивира да тренираш?
Бојана K.: Ме мотивира желбата да станам подобра верзија од себе. Тренинзите ми помагаат не само физички, туку и ментално, така што ме ослободуваат од стресот и ми ја подобруваат концентрацијата .
Superior Runs: Како се справуваш со физички и ментален замор?
Бојана K.: Се трудам да си го распоредам времето за тренинг и одмор. Покрај тоа, поминувањето време со фамилијата, и времето во природа ме релаксира и ми ја обновува енергијата.
Superior Runs: Која е твојата досега омилена трка и која трка или локација е твојата досега неостварена желба?
Бојана K.: Сите трки ми се драги на свој начин, бидејќи секоја носи своја посебна енергија и искуство. Меѓутоа, би ја издвоила трката во Штип како мој роден град, што ми дава дополнителен мотив.
За неостварена желба, би сакала да учествувам на Two Oceans Marathon во Јужна Африка, како една предизвикувачка трка која има фасцинантна природна убавина и верувам дека би било неверојатно искуство.
Superior Runs: Ако можеш да создадеш своја трка, каква би била таа трка и кои би биле правилата?
Бојана K.: Можеби трка со елементи на мистерија, која би комбинирала физичка издржливост, ментални предизвици и интерактивни загатки, каде што учесниците би ги користеле сите свои сетила и интуиција
Superior Runs: Што би сакала да постигнеш во иднина?
Бојана K.: Во иднина, би сакала да се остварам како успешен доктор и да продолжам со трчањето како начин за личен развој и баланс. Верувам дека медицината и спортот може да се надополнуваат, и двете дисциплини ми даваат мотивација да станам подобра верзија на себе
